مفتتح
يا ورده مابتعرف جفاف
يا ضي زيه الليل ما شاف
برضع ف نورك من بعيد
مع اني اصلا مش بخاف
القصيده
سدرك حليب
والعقد حبات الندي
يا صاحبة الوش البشوش
خايف ابوس ..خدك
تدبل الزهرات
والاغنيات تتخنق
بين الشفايف
خايف..بايدي اتلمسك
مع اني بتنفسك
من قبل ما تكوني
زرعك ف تكويني
ف متبعديش
واستحلفك..متقربيش
خليكي دايما بين وبين
البحر بتصونه الشطوط
لو ينفلت يغرق يموت
بين الرمال
قلبي اللي مال
رغم ان نبضه بيعشقك
وبيرسمك..جواه نقط
بتمد روحه بالحياه
بيحلفك...بنور عنيكي ورعشته
لما لمس بعنيه اديكي
متقربيش
خايف عليكي
ليست هناك تعليقات:
إرسال تعليق